தேசிய மட்டத்தில் கௌரவிக்கப்பட்ட காத்தான்குடி ஜனாஸா நலன்புரி அமைப்பு

சர்வதேச இரத்ததான கொடையாளர்கள் தினத்தை முன்னிட்டு 14.06.2026 இன்று கொழும்பு பண்டாரநாயக்கா ஞாபகார்த்த சர்வதேச மாநாட்டு  மண்டபத்தில் நடைபெற்ற தேசிய நிகழ்வில், காத்தான்குடி ஜனாஸா நலன்புரி அமைப்பும் கௌரவிக்கப்பட்டமை எமக்கு மிகுந்த மகிழ்ச்சி  அளிக்கின்றது.

மனித உயிர்களைக் காப்பாற்றும் உயரிய நோக்கத்துடன் எமது அமைப்பினால் கடந்த காலங்களில் தொடர்ச்சியாக ஏற்பாடு செய்யப்பட்ட இரத்ததான முகாம்கள் மற்றும் அதனூடாக சமூகத்திற்கு வழங்கப்பட்ட மனிதநேய சேவைகளைப் பாராட்டி இந்த தேசிய அங்கீகாரமும் கௌரவிப்பும் வழங்கப்பட்டுள்ளது.

இன்றைய உலகில் இரத்தத்தின் தேவை நாளுக்கு நாள் அதிகரித்து வருகின்ற நிலையில், அவசர சிகிச்சைகள், விபத்துகள், அறுவைச் சிகிச்சைகள், பிரசவத் தேவைகள் மற்றும் பல்வேறு நோய்களுக்கான சிகிச்சைகளில் இரத்தம் இன்றியமையாததாக காணப்படுகின்றது. இத்தகைய சூழ்நிலையில், சமூகத்தின் மத்தியில் இரத்ததானம் தொடர்பான விழிப்புணர்வை ஏற்படுத்தி, தன்னார்வ இரத்ததானிகளை ஊக்குவித்து, திட்டமிட்ட முறையில் இரத்ததான முகாம்களை நடத்தி வந்த எமது அமைப்பின் சேவைகள் தேசிய மட்டத்தில் அங்கீகரிக்கப்பட்டிருப்பது எமக்கு கிடைத்த மிகப் பெரிய வெற்றியாகும்.

காத்தான்குடி ஜனாஸா நலன்புரி அமைப்பு தனது ஆரம்ப காலத்திலிருந்து சமூக நலன், மனிதாபிமான சேவைகள் மற்றும் பொதுமக்களின் அவசர தேவைகளை நிறைவேற்றும் பணிகளில் அர்ப்பணிப்புடன் செயல்பட்டு வருகின்றது. அதில் ஒரு முக்கிய செயற்பாடாக இரத்ததான முகாம்களை தொடர்ந்து ஏற்பாடு செய்து வந்துள்ளோம். இந்த முகாம்களின் மூலம் நூற்றுக்கணக்கான இரத்தப் பைகளும், ஆயிரக்கணக்கான உயிர்களுக்கு நம்பிக்கையையும் வழங்கியுள்ளமை குறிப்பிடத்தக்கதாகும்.

இந்த கௌரவிப்பு எமது அமைப்பின் நிர்வாக சபை உறுப்பினர்கள், செயற்குழு உறுப்பினர்களுக்கு  மட்டுமல்ல. மாறாக, இதுவரை நடைபெற்ற அனைத்து இரத்ததான முகாம்களிலும் கலந்து கொண்டு தமது விலைமதிப்பற்ற இரத்தத்தை வழங்கிய இரத்ததான கொடையாளர்கள், ஊடக நண்பர்கள்,நிதி மற்றும் பொருளாதார ரீதியில் ஒத்துழைப்பு வழங்கிய நன்கொடையாளர்கள், எமது அழைப்புகளுக்கு செவிசாய்த்து ஆதரவு வழங்கிய பொதுமக்கள் மற்றும் எமது அனைத்து நலன்விரும்பிகளுக்கும் சமமாக உரித்தான கௌரவிப்பாகும்.

குறிப்பாக, எமது இரத்ததான முகாம்களை வெற்றிகரமாக நடத்துவதற்கு நேரடியாகவும் மறைமுகமாகவும் பங்களிப்பு வழங்கிய அனைவரின் ஒத்துழைப்பே இந்த சாதனைக்கு அடித்தளமாக அமைந்துள்ளது. எனவே இந்த தேசிய அங்கீகாரத்தை அவர்களுடன் பகிர்ந்து கொள்வதில் நாம் பெருமை அடைகின்றோம்.

இந்த கௌரவிப்பு எமக்கு மேலும் பொறுப்புணர்வையும் உற்சாகத்தையும் வழங்கியுள்ளது. எதிர்காலத்திலும் சமூகத்தின் தேவைகளை அடையாளம் கண்டு, மனிதநேய பணிகளை விரிவுபடுத்துவதோடு, அதிகளவான இரத்ததான முகாம்களை ஏற்பாடு செய்து உயிர்களைக் காப்பாற்றும் பணியில் தொடர்ந்து ஈடுபடுவோம் என உறுதியளிக்கின்றோம்.

எமது அனைத்து செயற்பாடுகளுக்கும் தொடர்ந்தும் ஆதரவு வழங்கி வரும் பொதுமக்கள், நன்கொடையாளர்கள், சமூக ஆர்வலர்கள், ஊடக நண்பர்கள் மற்றும் தன்னார்வ தொண்டர்கள் அனைவருக்கும் எமது மனமார்ந்த நன்றிகளைத் தெரிவித்துக் கொள்கின்றோம்.

"ஒரு துளி இரத்தம் – ஒரு உயிரின் நம்பிக்கை"

"இரத்ததானம் செய்வோம், உயிர்களைக் காப்போம்" 

ஜனாஸா நலன்புரி அமைப்பு காத்தான்குடி🩸