புதன்கிழமை அரசு விடுமுறை தினத்தை திங்கட்கிழமைக்கு மாற்றுமாறு சபாநாயகரைக் கோருகின்றேன் ரவூப் ஹக்கீம்

 

(எம்.எஸ்.எம்.ஸாகிர்)

"அமெரிக்காவை பகைத்துக் கொள்வதற்கு இலங்கை அரசாங்கம் அஞ்சுகிறது என பாராளுமன்றத்தில் மு.கா தலைவர் ரவூப் ஹக்கீம் தெரிவித்தார்.

மத்திய கிழக்கு போர் நிலை தொடர்பான சபை ஒத்திவைப்பு வேளை பிரேரணை மீதான விவாதத்தில் உரையாற்றுகையிலே கண்டி மாவட்ட எம்.பி.யும் முஸ்லிம் காங்கிரஸ் தலைவருமான ரவூப் ஹக்கீம் மேற்கொண்டவாறு தெரிவித்தார்.

தொடர்ந்து பேசிய அவர் மேலும் தெரிவிக்கையில்,

தற்போது ஈரான் மீது திணிக்கப்பட்டுள்ள இந்த துரதிர்ஷ்டவசமான போர் உலகளாவியரீதியில் சிக்கல்களை உருவாக்கியுள்ளது. இதில் முக்கியமான ஒன்று, உலகம் எதிர்கொண்டுள்ள எண்ணெய் தட்டுப்பாடு ஆகும். 

ஒருபுறம் 'அப்பார்த்தைட்' (இன ஒதுக்கல்) நாடு என்று அழைக்கப்படும் இஸ்ரேல், பலஸ்தீனியர்களுக்கு எதிராகக் கடுமையான இனப்படுகொலையில் ஈடுபட்டு வருகின்றபோது. ஈரான் இனப்படுகொலை செய்ததா? ஈரானில் அப்பார்த்தைட் ஆட்சி உள்ளதா? இல்லை.

ஆனால், ஓர் இன ஒதுக்கல் நாடும் (இஸ்ரேல்) இனப்படுகொலை நாடும் (அமெரிக்காவுடன் இணைந்து) ஈரான் மீது குண்டுவீசி அதன்  தலைவர்கள் பலரைக் கொன்றுள்ளன. 

இந்த அரசாங்கத்திற்கு அதை விமர்சிக்க முதுகெலும்பு இல்லை. இது ஒரு சமச்சீரற்ற போர்; இரண்டு மாறுபட்ட இராணுவ சக்திகளுக்கு இடையிலான போர். அமெரிக்காவின் இராணுவ பலத்தை ஈரானுடன் ஒப்பிட முடியாது. ஆனால், நான்கு ஐந்து நாட்களில் முடிந்துவிடும் என்று சொல்லப்பட்ட போர், இப்போது 4 வாரங்களைத் தாண்டியும் நீடிக்கிறது. இது மாதக்கணக்கில் கூட செல்லலாம். ஏனென்றால், அவர்கள் தயாராக இருக்கிறார்கள்.

யார் அதிக வலியைத் தாங்கிக்கொள்கிறார்கள் என்பதுதான் இங்கு எழுகின்ற கேள்வி. "எங்களுக்கு நொந்தால்  நீங்களும் அந்த நோவினையை அனுபவிப்பீர்கள்" என்பதுதான் ஈரானியர்களின் அணுகுமுறை. இன்று இலங்கையில் ஒரு பொது வாக்கெடுப்பு நடத்தினால், அனைத்து சமூகங்களும் ஈரானுடன்தான் நிற்கும், அமெரிக்காவுடனோ அல்லது இஸ்ரேலுடனோ அல்ல. 

சமூக ஊடகங்களைப் பாருங்கள். ஆனால், துரதிர்ஷ்டவசமாக, அமெரிக்கர்களைப் புண்படுத்தும் எதையும் சொல்லக்கூடாது என்பதில் இலங்கை அரசாங்கம் உறுதியாக உள்ளது.

நமது கடல் எல்லைக்கு அருகில் ஈரானியக் கப்பல் ஒன்று தாக்கப்பட்டபோது கூட இதுதான் நடந்தது. ஒரு முடிவெடுக்க நாம் 11 மணிநேரம் எடுத்துக்கொண்டோம். (11) நீண்ட மணிநேரம் அவர்களை அங்கேயே விட்டுவிட்டோம். வெளியுறவு அமைச்சுக்கு இராஜதந்திர குறிப்பொன்று அனுப்பப்பட்டது. ஆனால் ,11 மணிநேரத்திற்கும் மேலாக முழு அமைதி நிலவியது. பாதுகாப்புச் சபையில் கூட விவாதிக்கப்பட்டது, ஆனால், முடிவு எடுக்கப்படவில்லை. ஒரு நட்பு நாட்டை நீங்கள் இப்படித்தான் நடத்துவீர்களா?

இறுதியில் 100 மாலுமிகள் தங்கள் உயிரைக் கொடுத்தனர். அவர்கள் முழுமையான மாலுமிகள் அல்லர், அவர்கள் பயிற்சி பெறும் வீரர்கள் (Cadets). அவர்கள் போரில் ஈடுபடவில்லை. ஆனால், நமது பொருளாதார வலயத்திற்கு அருகில் அவர்கள் தாக்கப்பட்டனர். நீங்கள் அந்தக் கப்பலை நமது துறைமுகங்களில் ஒன்றிற்கு வர அனுமதித்திருந்தால், இது நடந்திருக்காது.

பின்னர் ஜனாதிபதி ஒரு விசேட செய்தியாளர் மாநாட்டை நடத்தி, "நாங்கள் மனிதாபிமான கடமையைச் செய்தோம், மாலுமிகளைக் காப்பாற்றினோம், காயமடைந்தவர்களை மருத்துவமனைக்கு அழைத்துச் சென்றோம்" என்று கூறினார். நல்லது, ஆனால் சர்வதேச உடன்படிக்கைகளின்படி அதைச் செய்ய நீங்கள் கடமைப்பட்டிருக்கிறீர்கள்.

பால்க்கி சர்மாவுடனான அந்தப் புகழ்பெற்ற குழு விவாதத்தில் கௌரவ வெளியுறவு அமைச்சர் பேசியது இந்த உடன்படிக்கையைப் பற்றித்தான். வெளியுறவு அமைச்சரின் மொழித் திறமையைப் பற்றிப் பேசுவது என் நோக்கமல்ல. ஆனால், அவரிடம் இந்தச் சம்பவம் மற்றும் நமது பதில் நடவடிக்கை குறித்துக் கேட்கப்பட்டபோது, அவர் 'பச்சை பொருளாதாரம்' (Green Economy) மற்றும் 'அன்க்லோஸ்' (UNCLOS) பற்றியே பேசிக்கொண்டிருந்தார். கேட்கப்பட்ட கேள்விக்கும் பச்சைப் பொருளாதாரத்திற்கும் என்ன சம்பந்தம்?  எப்படியோ, இந்த மோதலில் நமது நிலைப்பாடுகள் குழப்பமடைந்துள்ளன.

அந்த மாலுமிகளைக் காப்பாற்றியதில் நமக்கு ஓரளவுக்குத் திருப்தி இருக்கலாம். ஆனால், இறுதியில் நட்பு நாடுகளுடனான நற்புறவு சீர்குலைந்து போயுள்ளது. 

ஜனாதிபதியின் இப்தார் நிகழ்விற்கு மலேசியா மற்றும் இந்தோனேசியாவைத் தவிர முஸ்லிம் நாடுகளில் இருந்து யாருமே வரவில்லை என்பதை முஜிபுர் ரஹ்மான் எம்.பி இங்கு சுட்டிக்காட்டினார். எங்களை அழைத்ததற்கு நன்றி, எங்களை ஜனாதிபதி அழைத்ததால் நாங்கள் வந்தோம். ஆனால், வளைகுடா பிராந்தியத்தின் முக்கிய நாடுகள் ஏன் வரவில்லை? இது மிகவும் துரதிர்ஷ்டவசமானது.

"அமெரிக்காவின் இராணுவத் தளத்தை யார் வைத்திருந்தாலும் அவர்கள் எங்கள் இலக்காக மாறுவார்கள்" என்று ஈரானியர்கள் முன்பே எச்சரித்திருந்தனர். அவர்கள் துல்லியமான தாக்குதல்களை நடத்தியுள்ளனர். அவர்களிடம் இவ்வளவு தொழில்நுட்ப அறிவு இருக்கும் என்று யாரும் எதிர்பார்த்திருக்கவில்லை. இது இன்னும் பல வாரங்களுக்கு நீடிக்கும். ஹார்முஸ் ஜலசந்தி என்பது சுமார் 2 கிலோமீட்டர் செல்லக்கூடிய பகுதியாகும். இவ்வளவு பெரிய உலகளாவிய இராணுவ பலம் கொண்ட அமெரிக்கா இப்போது தனது நட்பு நாடுகளிடம் உதவி கேட்கிறது. ஆனால், யாரும் முன் வரவில்லை. ஏன்? ஏனென்றால், இது மிகவும் ஆபத்தான நிலைமை.

இந்த நிலைமை நீடித்தால், உலக எண்ணெய் விநியோகத்தில் 20% பாதிக்கப்படுவது மட்டுமல்லாமல், செங்கடல் போக்குவரத்தை ஹூத்திகள் குறிவைக்கத் தொடங்கினால், மேலும் 12-30% விநியோகம் ஆபத்தில் சிக்கக்கூடும். இத்தகைய இக்கட்டான சூழலில் நாம் இருக்கிறோம். இத்தகைய உலகளாவிய சம்பவங்களை நாம் முன்கூட்டியே கணிக்காமல் இருந்திருக்கலாம், ஆனால் அவை நடக்கும்போது, உண்மையை உண்மையாகச் சொல்லும் தைரியம் நமக்கு இருக்க வேண்டும். தற்போதைய ஆளும் கட்சி எதிர்க்கட்சியாக இருந்தபோது அதுதான் அவர்களின் நிலைப்பாடாக இருந்தது. இப்போது அவர்கள் ஏகாதிபத்தியவாதிகளின் நெருங்கிய நண்பர்களாகிவிட்டனர்.

காசா பகுதியில் நடக்கும் பயங்கரமான யுத்த மீறல்கள் குறித்து நீங்கள் மௌனமாக இருந்தீர்கள். திருப்தியளிக்காத சில வார்த்தைகளை மட்டுமே கூறினீர்கள். இது பலஸ்தீனியர்களுக்கோ அல்லது ஈரானியர்களுக்கோ திருப்தி அளிக்கவில்லை. நமது பலவீனமான வெளியுறவுக் கொள்கையால் நாம் எல்லாப் பக்கங்களிலும் நண்பர்களை இழந்து வருகிறோம். 

இன்னொரு முக்கிய விடயம் பற்றி கதைக்க வேண்டும். அதாவது, 

நாட்டின் தற்போதைய நெருக்கடி நிலையால் வாரந்தோறும் புதன்கிழமை  விடுமுறை தினமாக அரசாங்கத்தினால் அறிவிக்கப்பட்டுள்ளது. 

பாராளுமன்றம் செவ்வாய்க்கிழமை முதல் வெள்ளிக்கிழமை வரையான 4 தினங்கள் கூடும் நிலையில் புதன்கிழமை அறிவிக்கப்பட்டுள்ள அரசாங்க விடுமுறை தினத்தால் தூரப்பிரதேசங்களிலிருந்து வரும் பாராளுமன்ற உறுப்பினர்கள் பாதிக்கப்படுகின்றனர்.

​எனவே, இந்த அரசாங்கம் விடுமுறை தினத்தை திங்கட்கிழமைக்கு மாற்றுமாறு சபை முதல்வரான அமைச்சர் பிமல் ரத்நாயக்கவிடம் கோரியபோது, அவர் ஜனாதிபதியிடம் கேட்குமாறு கூறுகின்றார். பாராளுமன்ற விடயங்களை ஜனாதிபதி தீர்மானிப்பதில்லை. 

எனவே, மக்களின் அதிக பிரச்சினைகள் பேச வேண்டியிருப்பதனால் பாராளுமன்றம் தொடர்ந்தும் 4 தினங்களும் கூடும் வகையில் புதன்கிழமை அரசு விடுமுறை தினத்தை திங்கட்கிழமைக்கு மாற்றுமாறு சபாநாயகரைக் கோருகின்றேன் என்றார்.