உண்மையான தலைமை என்பது பதவிகளையோ அதிகாரத்தையோ சார்ந்தது அல்ல, மாறாக மற்றவர்களின் நலனுக்காகப் பொறுப்புடன் செயல்படுவதே ஆகும் - பிரதமர்

உண்மையான தலைமை என்பது பதவிகளையோ அதிகாரத்தையோ சார்ந்தது அல்ல, மாறாகப் பொறுப்புடனும், கருணையுடனும் செயல்பட்டு, மற்றவர்களின் நலனுக்காக உழைப்பதே ஆகும் என்று பிரதமர் டாக்டர். ஹரினி அமரசூரிய தெரிவித்தார். 

பெண்கள் மற்றும் இளம் பெண்களை மேம்படுத்துவதற்காக அர்ப்பணிக்கப்பட்ட நாட்டின் முன்னணி தன்னார்வ அமைப்புகளில் ஒன்றான இலங்கை பெண் வழிகாட்டிகள் சங்கத்தால் ஏற்பாடு செய்யப்பட்ட ஜனாதிபதி வழிகாட்டி விருது மற்றும் பிரதமர் விருது வழங்கும் விழாவில் கலந்துகொண்டபோது பிரதமர் இந்தக் கருத்துக்களைத் தெரிவித்தார். 

இவ்விழா ஜூலை 19 அன்று கொழும்பில் உள்ள டெம்பிள் ட்ரீஸில் நடைபெற்றது. இந்நிகழ்வின் போது, ​​பிரதமர் விருது பெற்றவர்களுக்குப் பதக்கங்களையும் சான்றிதழ்களையும் வழங்கினார். 

விருது பெற்றவர்களின் ஒழுக்கம், மனவுறுதி, நேர்மை மற்றும் பிறருக்குச் சேவை செய்வதில் உள்ள அர்ப்பணிப்பு ஆகியவற்றை அங்கீகரிக்கும் வகையில், இந்த ஆண்டு விழாவில் 338 ஜனாதிபதி வழிகாட்டி விருதுகள் மற்றும் 12 பிரதமர் விருதுகள் என மொத்தம் 350 விருதுகள் வழங்கப்பட்டன. 

இந்நிகழ்வில் உரையாற்றிய பிரதமர் டாக்டர். ஹரினி அமரசூரிய, பெண் வழிகாட்டிகள் சங்கத்தின் மிகப்பெரிய பலங்களில் ஒன்று, ஒவ்வொரு குழந்தைக்கும், அவர்களின் பின்னணி அல்லது திறன்களைப் பொருட்படுத்தாமல், சம வாய்ப்புகளை வழங்குவதற்கான அதன் அர்ப்பணிப்பு ஆகும் என்று குறிப்பிட்டார். 

உண்மையான தலைமை என்பது பதவிகளாலோ அல்லது அதிகாரத்தாலோ வரையறுக்கப்படுவதில்லை, மாறாகப் பொறுப்புடன் செயல்படுவது, இரக்கத்துடன் செவிமடுப்பது மற்றும் பிறரின் நலனுக்காக உழைப்பது ஆகியவற்றால் வரையறுக்கப்படுகிறது என்று பிரதமர் மேலும் வலியுறுத்தினார். 

கடந்த காலத்தில் பெண்களுக்குக் குறைந்த வாய்ப்புகளே இருந்தன என்றும், ஆனால் இன்று அனைத்துத் துறைகளிலும் சிறுமிகளுக்கும் பெண்களுக்கும் பெருகிவரும் வாய்ப்புகள் உருவாக்கப்பட்டு வருகின்றன என்றும், இளம் பெண்கள் ஒவ்வொரு துறையிலும் குறிப்பிடத்தக்க முன்னேற்றம் அடைந்து வருகின்றனர் என்றும் பிரதமர் மேலும் குறிப்பிட்டார். 

ஒவ்வொரு சிறுமியும் இளம் பெண்ணும் தங்களை மேம்படுத்திக் கொள்ள சம வாய்ப்புகளுக்குத் தகுதியானவர்கள் என்றும், இலங்கைக்கு ஒரு சிறந்த எதிர்காலத்தைக் கட்டியெழுப்ப முன்வரத் தயாராக இருக்கும் இளம் பெண் தலைவர்கள் நாட்டிற்குத் தேவை என்றும் பிரதமர் மேலும் வலியுறுத்தினார்.