உலகின் மிகச்சிறந்த தீவு சுற்றுலாத் தலமாக இலங்கை தேர்வு: உலகப் புகழ்பெற்ற தேயிலைத் தோட்டங்கள்

சர்வதேச சுற்றுலா இதழான ‘பிக் 7 டிராவல்’ (Big 7 Travel) வெளியிட்டுள்ள சமீபத்திய தரவரிசையின்படி, 2026 ஆம் ஆண்டில் மக்கள் பார்வையிடுவதற்கு உலகின் மிகச்சிறந்த தீவு சுற்றுலாத் தலமாக இலங்கை முதலிடத்தைப் பிடித்துள்ளது.

சுற்றுலா செல்ல வேண்டிய 50 சிறந்த தீவுகளின் பட்டியலில் இலங்கை முதலிடத்தைப் பெற்றுள்ளது.

நாட்டின் 833 மைல் நீளமுள்ள கடற்கரை, அழகிய மத்திய மலைப்பகுதி, உலகப் புகழ்பெற்ற தேயிலைத் தோட்டங்கள், செழுமையான கலாச்சார பாரம்பரியம், வியக்கத்தக்க பல்லுயிர்ப் பெருக்கம் (biodiversity) ஆகியவையே இந்தத் தரவரிசையில் இலங்கை முதலிடம் பெறுவதற்குக் காரணமான முக்கிய காரணிகளாக அந்த இதழ் சுட்டிக்காட்டியுள்ளது.

யால தேசிய பூங்கா மற்றும் யுனெஸ்கோவினால் உலக பாரம்பரியத் தளமாக அறிவிக்கப்பட்டுள்ள சிகிரியா உள்ளிட்ட புகழ்பெற்ற சுற்றுலாத் தலங்கள், இலங்கை இந்த முதலிடத்தைப் பெறுவதில் முக்கிய பங்கு வகித்துள்ளதாகவும் அந்த அறிக்கையில் குறிப்பிடப்பட்டுள்ளது.

நாட்டின் சுற்றுலாத் துறைக்கு மேலும் வலுவூட்டும் வகையில், உலகின் 50 சிறந்த கடற்கரைகளின் பட்டியலில் உனவடுன (Unawatuna) கடற்கரை 26-வது இடத்தைப் பிடித்துள்ளதாக அந்த அறிக்கை தெரிவிக்கிறது.