சவூதி அரேபியாவுக்கான இலங்கைத் தூதுவர் அமீர் அஜ்வத், சவூதி - இலங்கை வர்த்தக சபையின் தலைவருடனான சந்திப்பு

சவூதி அரேபியாவுக்கான இலங்கைத் தூதுவர் அமீர் அஜ்வத், சவூதி - இலங்கை வர்த்தக சபையின் தலைவர் திரு. அப்துல் ஹாதி அல்-கர்னியுடன் முதன்மை கலந்துரையாடல் ஒன்றை மேற்கொண்டார்.

எதிர்வரும் 2027 ஜனவரி 14 முதல் 17 வரை கொழும்பில் உள்ள பண்டாரநாயக்க சர்வதேச மாநாட்டு மண்டபத்தில் (BMICH) நடைபெறவுள்ள முதன்மை சர்வதேச வர்த்தகக் கண்காட்சியான "இலங்கை எக்ஸ்போ 2027" (Sri Lanka Expo 2027) நிகழ்வில் பங்கேற்பதற்காக உயர் மட்ட சவூதி வர்த்தகக் குழுவொன்றை இலங்கைக்கு அனுப்புவது தொடர்பாகவே இக்கலந்துரையாடல் இடம்பெற்றது.

ரியாத்தில் உள்ள இலங்கைத் தூதரகத்திற்கு வருகை தந்த சவூதி - இலங்கை வர்த்தக சபையின் தலைவர் அப்துல் ஹாதி அல்-கர்னியை வரவேற்ற தூதுவர் அமீர் அஜ்வத், தொழில் மற்றும் தொழில்முனைவோர் அபிவிருத்தி அமைச்சுடன் இணைந்து இலங்கை ஏற்றுமதி அபிவிருத்தி சபை (EDB) ஏற்பாடு செய்யும் "இலங்கை எக்ஸ்போ 2027" க்கான ஆயத்தங்கள் குறித்து அவருக்கு விளக்கமளித்தார். இந்த எக்ஸ்போ கண்காட்சியானது நூற்றுக்கணக்கான இலங்கை ஏற்றுமதியாளர்கள், சர்வதேச கொள்வனவாளர்கள், முதலீட்டாளர்கள், கொள்கை வகுப்பாளர்கள் மற்றும் உலகம் முழுவதிலுமிருந்து வரும் வர்த்தகத் தலைவர்களை ஒரே இடத்தில் இணைக்கும் என்று அவர் குறிப்பிட்டார். இந்த நிகழ்வு இலங்கையின் பல்வேறுபட்ட ஏற்றுமதித் துறைகளைக் காட்சிப்படுத்துவதுடன், வர்த்தக மற்றும் முதலீட்டு வாய்ப்புகளை மேம்படுத்தி, வணிகங்களுக்கு இடையிலான (B2B) தொடர்புகளை இலகுபடுத்தும் என்றும், ஒரு போட்டித்தன்மைமிக்க மற்றும் நம்பகமான உலகளாவிய வர்த்தகப் பங்காளியாக இலங்கையின் நிலையை மேலும் வலுப்படுத்தும் என்றும் தெரிவித்தார்.

உயர் மட்ட சவூதி வர்த்தகக் குழுவின் பங்கேற்பானது, சவூதி வர்த்தகத் தலைவர்கள் மற்றும் முதலீட்டாளர்களுக்கு இலங்கையின் வர்த்தக மற்றும் முதலீட்டு திறன்களை ஆராயவும், நேரடி வர்த்தகத் தொடர்புகளை ஏற்படுத்தவும், உணவு மற்றும் பானங்கள், விவசாயம், மீன்பிடி, தேயிலை, நறுமணப் பொருட்கள், ஆடைகள், சுற்றுலா, தகவல் மற்றும் தொடர்பாடல் தொழில்நுட்பம் (ICT), தளவாடங்கள் மற்றும் உற்பத்தி உட்பட பலதரப்பட்ட துறைகளில் புதிய கூட்டாண்மைகளைக் கண்டறியவும் ஒரு சிறந்த வாய்ப்பை வழங்கும் என்று தூதுவர் சுட்டிக்காட்டினார்.

இதற்குப் பதிலளிக்கும் விதமாக, இந்த முக்கியமான வர்த்தக நிகழ்வு குறித்து தூதுவர் வழங்கிய விளக்கத்தைப் பாராட்டிய சவூதி - இலங்கை வர்த்தக சபையின் தலைவர், சவூதி வர்த்தக சமூகத்தினர் மத்தியில் இலங்கை எக்ஸ்போ 2027 கண்காட்சியை ஊக்குவிப்பதற்கும் ஆதரவளிப்பதற்கும் வர்த்தக சபை அதிக ஆர்வம் காட்டி வருவதாகத் தெரிவித்தார். "இலங்கை எக்ஸ்போ 2027" இல் பங்கேற்பதற்கும், இலங்கையில் உள்ள பல்வேறுபட்ட முதலீட்டு மற்றும் வர்த்தக வாய்ப்புகளை ஆராய்வதற்கும் ஒரு உயர் மட்ட சவூதி வர்த்தகக் குழுவை ஒருங்கிணைத்து அனுப்புவதற்கு வர்த்தக சபையின் முழுமையான ஆதரவை வழங்குவதாக அவர் தூதுவருக்கு உறுதியளித்தார்.

இரு நாடுகளின் வர்த்தகச் சமூகங்களுக்கு இடையே வர்த்தகம், முதலீடு மற்றும் மூலோபாயக் கூட்டாண்மைகளுக்கான புதிய வழிகளை உருவாக்குவதற்கும், இருதரப்பு பொருளாதார உறவுகளை மேலும் வலுப்படுத்துவதற்கும் சவூதி வர்த்தக சம்மேளனங்கள் மற்றும் பரந்த சவூதி வர்த்தக சமூகத்துடன் இணைந்து நெருக்கமாகப் பணியாற்றுவதற்கு இரு தரப்பும் ஒப்புக்கொண்டன.

முதலாவது சவூதி - இலங்கை கூட்டு வர்த்தக சபை, இலங்கையின் வெளிநாட்டலுவல்கள், வெளிநாட்டு வேலைவாய்ப்பு மற்றும் சுற்றுலாத்துறை அமைச்சர் விஜித ஹேரத் அவர்களின் உத்தியோகபூர்வ விஜயத்தின் போது, 2025 நவம்பர் 11 அன்று ரியாத்தில் உள்ள சவூதி வர்த்தக சம்மேளனங்களின் தலைமையகத்தில் உத்தியோகபூர்வமாக ஆரம்பித்து வைக்கப்பட்டது.

இலங்கை வர்த்தக மற்றும் தொழில்துறை சம்மேளனங்களின் கூட்டமைப்பு (FCCISL) மற்றும் சவூதி வர்த்தக சம்மேளனங்களின் கூட்டமைப்பு (FSC) ஆகியவற்றுக்கு இடையே கையெழுத்திடப்பட்ட புரிந்துணர்வு ஒப்பந்தத்தின் (MoU) மூலமே இந்த வர்த்தக சபை உருவாக்கப்பட்டது.

இக்கலந்துரையாடலில் இலங்கைத் தூதரகத்தின் முதல் செயலாளரும் வர்த்தகப் பிரிவு அதிகாரியுமான தஷ்மா விதானவாசமும் கலந்துகொண்டார்.