சவூதி அரேபியாவுக்கான இலங்கைத் தூதுவர் அமீர் அஜ்வத் அப்ஹா வர்த்தகச் சங்கத்துடன் வணிக வாய்ப்புகள் குறித்து கலந்துரையாடல்

சவூதி அரேபியாவுக்கான இலங்கைத் தூதுவர் அமீர் அஜ்வத், இலங்கைக்கும் அஸீர் (Aseer) பிராந்தியத்திற்கும் இடையிலான வர்த்தக மற்றும் பொருளாதார ஒத்துழைப்பை வலுப்படுத்துவது குறித்து அப்ஹா வர்த்தகச் சங்கத்தின் (Abha Chamber of Commerce) பொதுச்செயலாளர் கலாநிதி மிஸ்ஃபர் ஏ. அல்-வதாய் உடன் கலந்துரையாடல் ஒன்றை நடத்தினார்.

இச்சந்திப்பின் போது, சவூதி-இலங்கை வர்த்தக சபை அண்மையில் நிறுவப்பட்டது உட்பட இலங்கைக்கும் சவூதி அரேபியாவுக்கும் இடையே அதிகரித்து வரும் தனியார் துறை ஈடுபாடுகள் குறித்து தூதுவர் விளக்கமளித்தார். 

குறிப்பாக, அஸீர் பிராந்தியத்தில் விரைவாக வளர்ந்து வரும் சுற்றுலாத் துறையைக் கருத்தில் கொண்டு, சுற்றுலா, விருந்தோம்பல், கைத்தொழில் மற்றும் மனித வளத் துறைகளில் இலங்கையின் தனியார் துறைக்கும் அஸீர் பிராந்தியத்திற்கும் இடையிலான ஒத்துழைப்பை மேலும் வலுப்படுத்துவதன் முக்கியத்துவத்தை அவர் வலியுறுத்தினார். 

அத்துடன், அஸீர் பிராந்தியத்தின் விரிவடைந்து வரும் சுற்றுலா மற்றும் விருந்தோம்பல் கட்டமைப்பிற்கு பங்களிப்பு செய்வதற்கான இலங்கையின் நிபுணத்துவம், தயாரிப்புகள் மற்றும் சேவைகளின் சாத்தியக்கூறுகளையும் தூதுவர் சுட்டிக்காட்டினார்.

மேலும், இலங்கையில் நடைபெறவுள்ள முக்கிய பொருளாதார நிகழ்வுகள் குறித்தும் தூதுவர் அமீர் அஜ்வத் தகவல்களைப் பகிர்ந்து கொண்டார்:

*இலங்கை முதலீட்டு பேரவை (Sri Lanka Investment Forum): 2026 அக்டோபர் 12 முதல் 13 வரை கொழும்பில் நடை பெறவுள்ளது. 

இதில் பங்கேற்று இலங்கையிலுள்ள முதலீட்டு வாய்ப்புகளை ஆராயுமாறு அஸீர் பிராந்திய வர்த்தக சமூகத்திற்கு அவர் அழைப்பு விடுத்தார்.

* இலங்கை எக்ஸ்போ 2027 (Sri Lanka Expo 2027): 2027 ஜனவரி 14 முதல் 17 வரை கொழும்பில் நடைபெறவுள்ளது.

இலங்கையின் தயாரிப்புகள், சேவைகள் மற்றும் முதலீட்டு வாய்ப்புகளைக் காட்சிப்படுத்துவதற்கான ஒரு முக்கிய தளமாக அமையும் இந்நிகழ்விலும் பங்கேற்குமாறு அவர் அழைப்பு விடுத்தார்.

இத்தகவல்களை வர்த்தகச் சங்கத்தின் உறுப்பினர்களிடையே பகிர்ந்துகொள்வதாக பொதுச் செயலாளர் உறுதியளித்தார்.

இலங்கையின் பலமான மனிதவள அடிப்படையைக் கருத்தில் கொண்டு, சவூதி அரேபியாவின் சுற்றுலா, விருந்தோம்பல் மற்றும் அது சார்ந்த துறைகளில் திறமையான மற்றும் அரைத் திறமையான இலங்கைத் தொழிலாளர்களைப் பணிக்கமர்த்துவதற்கான வாய்ப்புகள் குறித்தும் இச்சந்திப்பில் கவனம் செலுத்தப்பட்டது.

மேலும், அப்ஹா வர்த்தகச் சங்கத்தில் 'இலங்கை - அஸீர் வர்த்தக பேரவை' (Sri Lanka–Aseer Business Forum) ஒன்றை ஸ்தாபிப்பதற்கான சாத்தியக்கூறுகள் குறித்தும் விவாதிக்கப்பட்டது. 

வணிகங்களுக்கு இடையிலான (B2B) தொடர்புகளை வலுப்படுத்தவும், வர்த்தக கூட்டாண்மைகளை எளிதாக்கவும், வர்த்தக மற்றும் முதலீட்டு ஒத்துழைப்பிற்கான புதிய வழிகளை ஆராயவும் இதுபோன்றதொரு பேரவை சிறந்த தளமாக அமையும்.

இலங்கைக்கும் சவூதி அரேபியாவிற்கும் இடையிலான நீண்டகால மக்களுக்கிடையிலான மற்றும் பொருளாதார உறவுகளை மேலும் வலுப்படுத்தும் அதே வேளையில், பிராந்திய வர்த்தக சமூகங்களுடன் இணைந்து செயல்படுவதற்கும் வர்த்தகம், முதலீடு, சுற்றுலா மற்றும் தனியார் துறை கூட்டாண்மைகளை மேம்படுத்துவதற்கும் தூதரகம் மேற்கொண்டு வரும் தொடர்ச்சியான முயற்சிகளின் ஒரு பகுதியாக இச்சந்திப்பு அமைந்தது.